Concello de Verín

A base de Protección Civil de Verín acolleu a reunión de coordinación do Entroido 2025, un encontro clave para garantir o bo desenvolvemento dunha das celebracións máis emblemáticas da vila. Dende o ano 2013, a área de Seguridade Cidadá do Concello de Verín vén traballando na planificación e optimización das medidas de seguridade en grandes eventos, co obxectivo de que tanto veciños como visitantes poidan gozar da festa con todas as garantías.

O Conservatorio Profesional de Música do Concello de Verín (CMUS), en colaboración coa súa ANPA e co apoio do Concello de Verín, presenta a iniciativa “Arte e Música”, unha acción solidaria que culminará cun gran sorteo de 5 obras de arte durante a súa Gala de Fin de Curso o 7 de xuño de 2025 no Auditorio de Verín.

A concelleira de Turismo, Cultura e Festexos, Samanta Barreira, presentou esta mañá no Salón de Actos da Casa da Cultura a programación oficial do Entroido 2025, que ofrecerá máis de 160 horas de música en directo e unha ampla variedade de actividades destinadas a todos os públicos.

Verín acollerá o próximo 13 de febreiro a I Feira de Orientación Profesional, unha iniciativa novidosa organizada grazas á colaboración entre os Departamentos de Orientación dos tres centros públicos de secundaria da vila (IES Castro de Baronceli, IES Xesús Taboada Chivite e IES García Barbón) e a Dinamizadora da Relación con Empresas na FP do IES García Barbón. O evento desenvolverase no Auditorio de Verín en horario de mañá e está dirixido ao alumnado de 4º de ESO, 2º de FPB, Ciclo Medio de Coidados Auxiliares de Enfermaría e 2º de Bacharelato dos centros organizadores; ademais de estudantes de 4º de ESO dos centros concertados CPR María Inmaculada e CPR Mercedarios.

O CEIP Medeiros deseña o cartel oficial que representará o vindeiro Desfile Infantil do Entroido 2025, que percorre durante a mañá do Xoves de Comadres as rúas e prazas de Verín.