Concello de Verín

A organización do Fic Vía XIV de Verín confirma as tres primeiras actividades paralelas no marco dunha programación que pretende, en verbas da concelleira de Cultura do municipio, Emilia Somoza, “dinamizar a axenda cultural verinesa para divulgar o cinema entre todos os públicos”. Do mesmo xeito, o director do certame, Carlos Montero, pon en valor a variedade temática das actividades programadas, no marco da cales se desprazarán a Verín prestixiosas figuras de primeiro nivel do panorama cinematográfico e audiovisual tanto de Galicia e España coma do estranxeiro.

A IV edición da Feira de  Outono de Verín, que se celebrará os días 17 e 18 de  novembro  na  vila  do Támega, desenvolverá unha intensa  actividade  na  Praza  Maior de Verín, centrada  na alimentación e na gastronomía  baseada nos produtos típicos de  outono. Como novidade, nesta edición organizaranse  varias  sesións de showcooking impartidas por cociñeiros de catro restaurantes locais pertencentes a Asociación de Hosteleros de la Comarca de Monterrei (AHECOM) e por reputados bogueiros gastronómicos.

O Concello abre o prazo de licitación para que as empresas interesadas presenten as súas ofertas e participar no concurso  para a contratación da xestión indirecta, mediante concesión, do servizo de atención á terceira idade “Centro de día municipal de Verín”. A data límite para a presentación das propostas será o 4 de decembro. Esta nova xestión concrétase en prestacións de asistencia sanitaria, atención xeriátrica- rehabilitadora e social, atención á saúde  psicofísica así como socialización e participación.

O alcalde de Verín, Gerardo Seoane, reuniuse hoxe en Madrid co subdirector xeral de Xestión e Transporte Terrestre do Ministerio de Fomento, Benito Bermejo, para presentarlle os  proxectos de mellora da mobilidade e aforro enerxético e transporte de Verín. O representante de Fomento comprometeuse a realizar un seguimento dos mesmos, corroborando a oportunidade que supoñen para o futuro dun Verín máis sostible.